शहीद नायक सचिन जाधव यांच्यावर शासकीय इतमामात अंत्य संस्कार
पालकमंत्री बाळासाहेब पाटील आणि गृहराज्यमंत्री शंभूराज देसाई यांनी घेतलं अंत्यदर्शन
प्रतीक मिसाळ-पाटण
सातारा जिल्ह्यातील दुसाळे ता . पाटण येथील शहीद नायक सचिन संभाजी जाधव यांच्यावर शासकीय इतमामात आज संस्कार करण्यात आले यावेळी त्यांना मानवंदना देण्यात आली . शासनाच्या वतीने राज्याचे सहकार मंत्री तथा जिल्ह्याचे पालकमंत्री बाळासाहेब पाटील , गृहराज्य मंत्री शंभूराज देसाई यांनी पुष्पचक्र अर्पण करून आदरांजली वाहिली .
यावेळी जिल्हा पोलीस अधिक्षक तेजस्वी सातपुते , पाटणचे उपविभागीय अधिकारी श्रीरंग तांबे जिल्हा सैनिक कल्याण अधिकारी विजयकुमार पाटील , पाटणचे तहसीलदार समीर यादव यांनीही आदरांजली वाहिली . सातारा जिल्ह्यातील 111 इंजिनियर रेजिमेंटचे नायक सचिन संभाजी जाधव यांना दि . 16 सप्टेंबर 2020 रोजी सैन्यामध्ये सेवा बजावताना वीर मरण प्राप्त झाले होते . दुसाळे गावातून सजवलेल्या गाडीतून त्यांची अंत्ययात्रा काढण्यात आली . कोरोनाच्या पार्श्वभूमीवर सर्व ते नियम पाळून ग्रामस्थांनी आपल्या शूर भूमिपुत्राचे अतिशय शोकाकुल वातावरणात शेवटचे दर्शन घेतले .
