पुणे जिल्ह्यातील कोरोना रुग्णांच्या बिलाचे तब्बल साडेतीन कोटी रुपये केले कमी
मिलिंद लोहार-पुणे
कोरोना रुग्णांची संख्या वाढतेय. यामुळे आरोग्य यंत्रणेवर ताण पडत आहे. या पार्श्वभूमीवर खासगी रुग्णालयांनाही करोना रुग्णावर उपचार करण्यासाठी परवानगी दिलीय. पण काही खासगी रुग्णालयांकडून रुग्णांची लूट सुरू आहे. कोरोनाबाधित रुग्णांवर उपचार केल्यानंतर खासगी रुग्णांलयांकडून आकारण्यात येणाऱ्या जास्त रकमेच्या वैद्यकीय बिलांची तपासणी करण्यात येत असून, आतापर्यंत पुणे, पिंपरी चिंचवड महापालिका आणि जिल्ह्याच्या ग्रामीण भागातील रुग्णालयांनी दिलेल्या १९५१ बिलांची तपासणी झाली आहे. त्यातून सुमारे साडेतीन कोटी रुपये हे कमी करण्यात आले आहेत.
रक्कम कमी करण्यात आलेल्या वैद्यकीय बिलांमध्ये पुणे शहरातील ५००, पिंपरी-चिंचवडमधील ९२६ आणि ग्रामीण भागातील ५२५ बिले आहेत. जास्त रकमेची आकारणी केल्याबाबत आतापर्यंत पुणे शहरातील ८३ रुग्णालयांना नोटिसा बजावण्यात आल्या आहेत, असे जिल्हा प्रशासनाकडून सांगण्यात आले.
